Is biddas de Sardìnnia s’intendint solas, atesu de Casteddu e de is logus aundi si detzidit. Antis de su COVID s’ANCI iat scritu nau e propònnindu fràsias de importu (innoi) impitzus de su benidori de is biddas.
Comenti apariciai is comunus, aici chi potzant donai serbìtzius? Cantu provìntizias? S’area metropolitana de Casteddu tenit sentidu? O mellus nudda? O mellus duus?
Imoi chi funt passaus 20 mesis de is eletzionis, tocat a cambiai sa Regioni e su sistema de is entis localis.
S’arrespusta de Solinas est: NO! Faeus sceti cresci is provìntzias, e burraus s’area metropolitana de Casteddu.
Custu narat su “Testo unificato – Riforma dell’assetto territoriale della Regione. Modifiche alla legge regionale 4 febbraio 2016, n. 2”
Est una lei chi fait nasci is provìntzias de Gaddura, Sulcis-Iglesiente, Campidanu de Mesu, e nascit sa citadi metropolitana de Tàtari. Casteddu abarrat de nòmini.
Dinai sa lei no ndi ponit. Sa lei no narat nimancu chini fait ita. Totu abarrat oguali. Crescint is cadiras po is consilleris, is assessoris, is cumissàrius. Crescint is costus po issus, smenguant is serbìtzius.
Is pròprius chi iant apariciau unu “referendum” contras a is provìntzias, i “Riformatori”, imoi ant a votai custa lei. Francu de chini dd’at promòviu, sa chistioni est un’atra: su referendum at nau craru craru ca is sardus no bolint is provìntzias, e tui fais pròpriu cussu?
Areas metropolitanas.
Sadali e Seui funt in s’area metropolitana de Casteddu. O Sadali e Seui si funt spostaus, o s’area metropolitana de Casteddu no esistit. Est una “fictio”, est a nai una fingidura. Giai a tenni 12 areas metropolitanas in Italia fait arriri, ma a ndi tenni 2 in Sardìnnia no fait!
At a essi chi apu bìviu in Pechino….
Casteddu est una provìntzia, e Tàtari su pròpriu. Ddas tzerriaus “areas metropolitanas” poita diaici pensaus de ndi scabulli unu pagu de dinai in prus, e is tataresus funt prexiasu chi funt ogualis a is casteddaius.
E pustis? Nudda, totu sighit comenti antis, est a nai mali meda. In Sàdili e Seui totu at a sighiri comenti antis, e in is atrus logus puru.
Sa lei arregionali 2 de su 2016, chi at fatu nasci su chi imoi funt cambiendi, no fiat bona, e ndi funt lassendi sa carena. Aciungit unu pagu de provìntzias, e diaici unu pagu de genti est prus trancuilla. Et voilà sa reforma! Ancora si depit votai in consillu arregionali, perou tengu dudas chi calincunu si ndi at a scidai.
Oh, no si scit mai, chi no funtzionat in 5/10 annus podit essi ca is pròprius chi dda funt fendi fetzant unu referendum po sciusciai su chi imoi fraigant……ta bella sa Sardìnnia!
