Una pariga de mesis a oi TCS at mandau una interbista chi Franciscu Casula m’at fatu impitzus su sardu, e pruschetotu impitzus Franciscu Carlini.
Ddu podeis biri innoi
Custas diis una de is chistionis chi mi spantant est chi ddoi at intelletualis, no meda perou giai nci funt, chi scrint de “postcolonialismo”, “decolonialismo”, “subalternità”, bivint in Sardìnnia, e perou no imperant mai su chi studiant a su chi est sutzèdiu o est sutzedendi in Sardìnnia.
Bint su chi sutzedit atesu, ma no bint su chi sutzedit in domu de issu.
O no ddu bint, o no ddu bolint biri.
Custu arrexonamentu est ancora prus forti chi bieus sa chistioni de su sardu, e de is lìnguas de Sardìnnia in generali.
Su sardu no bintrat mai in is scioberus personalis. Funt pagus, ma pagus diaderus, is chi nant “mi piacerebbe imparare il sardo” o “mi piacerebbe parlare in sardo a mia figlia, a mio figlio”, e pustis ddu faint diaderus.
Comenti mai?
Comenti mai s’agatat su tempus po fai calichisiat cosa, fintzas imparai s’ingresu, e po sa lìngua tua su tempus no s’agatat mai?
Est tostada, ma tocat a gherrai.
