Spaciada sa Bregùngia in Nùgoro
Spaciada sa Bregùngia no est unu assòtziu. No si seus arregistraus, e candu arregolleus dinai pedeus agiudu a assòtzius che a Movidì po ddu arregistrai e ddu contivigiai.
Spaciada sa Bregùngia, po comenti dda biu deu, bolit essi una àtera cosa. Bolit essi unu movimentu chi partit de una scera simpri meda, personali: fueddai in sardu in dònnia logu de Sardìnnia e, pruschetotu, cun is pipias e is pipius.
Fendi polìtica, e bivendi in Sardìnnia, si intendit sèmpiri personis chi nant: “dobbiamo salvaguardare il sardo”, “le nostre radici sono il segreto per un futuro roseo”, “la nostra storia è un tesoro da trasmettere ai nostri figli e da sfruttare turisticamente”, “la nostra identità è l’elemento più forte che abbiamo”.
Su 95%/98% de is bortas custas fràsias funt in italianu de genti chi est nàscia in Sardìnnia e no imperat mai su sardu. Genti chi no scit su sardu. Genti chi at studiau s’ingresu, e bai e circa cali atras lìnguas, e chi perou no agatat mai su tempus de imparai pagu pagu de sardu.
In prus, tocat a sciri chi casi sèmpiri su sardu custus òminis e fèminas de Sardìnnia ddu tenint in conca, ddu connoscint giai, e no si ndi acatant, o faint finta de no si ndi acatai.
Spaciada sa Bregùngia no bolit fai “polìtica”, a su mancu comenti dda faint is àterus. Spaciada sa Bregùngia bolit fai pigai unu impinnu personali a is fèminas e is mascus chi pensant chi fueddai sa lìngua de su logu siat sinnu de libbertadi, de avoluto contras a sa oppressioni chi seus bivendi dònnia dii, in d-unu mundu chi si bolit totus ògualis e totus scraus. S’impinnu est simpri: fueddai in sardu cun is fillas e is fillus, imparai su sardu (mancai a pagu a pagu e a bellu a bellu) e circai de ddu fueddai in dònnia logu e in dònnia màmentu.
Pustis ddoi at sa scola, sa televisioni, is “app”, su telefoneddu, is lìbburus, is giorronalis, is carteddus, sa mùsica, su teatru e totu is àteras atividadis chi tocat a fai in sardu e cun su sardu. Totu si podit fai chi ddoi at s’impinnu personali. Podit essi difìtzili, ma no si ndi podit fai de mancu.
Cras seus in Nùgoro, in su tzìrculu culturali “Sa Bena”, in bia de Santu Martini 17, de is 7 de merì. Spereus de atòbiai a mammas e babbus, a òminis e fèminas, chi si bollant contai ita est sutzedendi in Nùgoro. Sa primu cosa chi boleus fai est ascurtai e cumprendi.
E, pustis, chi aturat tempus, eus a contai su chi eus fatu, su chi seus fendi e su chi, imparis, boleus fai.
Boleus cumprendi poita est chi in Nùgoro is babbus e is mammas no fueddant in sardu cun is fillas e is fillus, o poita ddu faint, eus a biri. Boleus cumprendi chi is piciocas de 14 annus fueddant in sardu aintru de issas, e poita ca no, o ca eja.
Boleus fraigai una comunidadi, oberta, orizontali, lìbbera.
Spaciada sa Bregùngia no tenit una seu, no tenit unu presidenti o unu segretàriu. Dònnia truma chi est in d-una bidda o citadi podit apariciai is atividadis chi prus andant beni in cussu logu. Poneus impari su chi scieus, su chi eus studiau, totu est a disponimentu de sa tenta: a fraigai una sociedadi sardofona.
Chi bivis in Nùgoro o a su costau, acostadì cras a merì!
Seus in “Sa Bena”, bia Santu Martine 17, a is 7 de merì!
