“The Social Dilemma” est unu documentàriu de Jeff Orlowski. Ddu podeis agatai in Netflix, e contat s’istòria de piciocas e piciocus chi anti detzìdiu de mollai is prus grandu siendas americanas de “internet” poita fiant trabballendi po fai mali a sa genti.
Su protagonista est Tristan Harris, chi cun meda atrus at fatu nasci su “Center for Human technology”.
Sa chistioni est simpri: is “social network” funt nascius, a su chi scieus, cun bideas diferentis, bellas e lègias. Oi, perou, su giogu est cambiau.
Is “social network” ant cambiau totu sa vida nosta, de candu si scidaus a mengianeddu a candu si crocaus. Totu sa manera de pensai, de vivi cun is atras e is atrus, de detzidi ita comporai e ita votai, dipendit de issus.
Est diaici po casi 2 miliardus de òminis. Pruschetotu poi is giòvunus sa vida est su chi ses in su telefoneddu.
Su documentariu contat custas cosas.
Chi unu tenit fillas e fillus, ddu depit castiai po issas e issus, e cumprendi ita si podit fai, comenti si podint pesai giòvunus chi no bivant in d-unu “Truman show” vitàniu.
Chi unu pensat a fai polìtica o sindacau, ddu depit castiai.
Tocat a ponni arregulas strintas a custas siendas mannas, chi cumandant su mundu, e no depint perou cumandai a nosu, chi boleus essi lìberus.
In su mundu Cina, Istadus Unius e Russia, po chistionis de geo-polìtica, funt pratzendisì s’arretza, e arretzas diferentis funt nascendi.
Unu logu piticu, comenti podit essi sa Sardìnnia, iat a podi detzizi, chi essit tentu su poderi de dhu fai, de ponni arregulas “moralis”, est a nai arregulas chi no pertocant sceti su poderi. Si podint fintzas ponni arregulas chi difendint is pipias e is pipius, sa “libertadi”, is “siendas piticas”. In d-unu fràsia, si podit difendit su pòpulu contra is colossus de su web.
Su capitalismu at inghitzau unu tretu nou, de unu bellu pagu, est a nai su “capitalismo della sorveglianza”. Chi no si ndi acataus est comenti a fai sa gherra, nosu a frunda, e issus a pistola.
E comenti narat su filmi, “chi unu òmini a pistola atòbiat unu òmini chena pistola, s’òmini chena pistola est unu òmini mortu”.
