Lìtera aberta apitzus de sa lìngua sarda

A su cunsìderu e bonu coru de
Is amigus de “Riprendiamoci la Sardegna”
Is amigus de “Sardigna sostenìbili e soberana”
Is amigus de “Casteddu Citadi Capitali”
Is cumpàngius de su “Tzìrculu Me-Ti”

Ogetu: Lìtera aberta apitzus de su lìngua sarda

Amigas, amigus, cumpàngias e cumpàngius istimadus,
a unu cumpàngiu chi gherrat sèmpiri po sa libertadi e sa giustìtzia ddi praxit arregordai is fueddus de Cicitu Masala apitzus de sa Sardigna e de sa lìngua (scusai-mì chi no funt fueddus filologicamente perfetus): “un òmini podit andai a d-ònnia logu, biri medas cosas, ma chi unu no sciit su chi nc’est in sa terra cosa sua, e chi no arrennescit a fueddai sa lìngua cosa sua, no arrennescit a cumprendi su mundu. Un’òmini est lìberu chi biit su logu aundi nci bivit, e ddu cumprendit”.
In custus annus chi seus gherrendi impari po una Sardigna lìbera e digna eus nau medas bortas chi sa lìngua est una “infrastruttura primaria”, una de is ainas fundamentalis po ndi fraigai una sociedadi aundi si potzat traballai chena de si-ndi andai foras, aundi si potzat bivi chena de arriciri sa corrutzioni, e aundi si-ndi potzant pesai arrelatas de paxi cun is chi traballant po sa paxi e dda bolint diaderus.
De una bisura polìtica, cun is cumpàngius e is amigus chi faint polìtica cun mei, seus is chi imperant su sardu in Casteddu e, impari a medas atrus, seus gherrendi po su sardu in d-unu movimentu linguìsticu po totus, chena de làcana peruna, foras chi chistionaus de arrespetu de s’òmini, chi no depit amancai mai.
Sa chistioni est custa e depit balli po totu si sardus: “Sa Sardigna at a sighiri a bivi chena de su sardu?”. S’arrespusta est a manera crara ca no, perou ddu depeus stichiri a conca a totus.
Ca s’arrespusta est ca no, depeus pigai s’impinnu a imparai su sardu, a ddu fueddai e a ddu imparai a is pipius. Depeus donai s’esempru.
Cun is patriotas de ProgReS eus giai inghitzau unu cursu de sardu, chi at a acabai su 17 de gennàrgiu cun d-una festa cun Màriu Puddu, su babai mannu de sa lìngua sarda. 
In s’interis, eus apariciau cun s’assòtziu “Lìngua bia” unu cursu de sardu bàsicu, chi at a inghitzai su 23 de gennàrgiu in Casteddu.
Chi boleus cambiai sa Sardigna depeus inghitzai cambiendi nosatrus etotu. Su cumbidu est, po is chi no sciint scriri in sardu, de s’assentai a su cursu. Chi boleus imparai su sardu a is pipius, e a totu is sardus, spetat a nosu a ddu fai, poita ca su gubernu Pigliaru e s’aministratzioni comunali de Casteddu funt bocendi-ddu su sardu, est a nai chi funt bocendi sa Sardigna e is sardus. E is arresurtaus ddus bieus.
In s’interis depeus imperai su sardu a su prus chi podeus.
Is sòtzius de “Lìngua Bia” funt abetendi-tì, po ndi sciit de prus podis scriri a infolinguabia@gmail.com
o podis tzerriai a su nùmeru 3294360961.
Cun istima,
Arricu Lobina.

Casteddu, su primu de gennàrgiu de su 2017