Interrogu a su Sìndigu de Casteddu apitzus de su pranu de sarvamentu chi nci est apretu nuleari

Premissu ca:
-In friàrgiu de su 2000 eus scoviau chi, in Itàlia, nci funt 11 portus tzivilis chi funt classificaus comenti “a rischio nucelare”, poita podint arriciri naiis e sutamarinus a spinta nucleari, chi passant ingunis;
-sèmpiri in su 2000, su Sìndigu Delogu, apustis de essi stètiu informau de su prefetu, at cunfirmau custa sceda in consillu comunali, donendi sa noa chi custas naiis e sutamarinus podint abarrai in sa cala e no in su mollu;
-Sa Marina Militari at preparau unu “Pranu de apretu po is naiis militaris a spinta nucleari in firmada” chi podint essi arricias in 11 portus, faendi una dèlega a is Prefeturas po preparai is pranus po sa sa genti interessada e po ddus pubricai;
-Su DL 230/1995 (Capu VII, art. 36 e sigh) ponit impitzus de is istitutzionis de is prefetus s’òbrigu de informai a is tzitadinus po su chi spetat a is atzionis de seguresa sanitària pigadas chi nci est arriscu nucleari o arriscu de ndi pigai radiatzionis;
– In su mesi de maju de su 2005 su Prefetu de Tàtari at pubricau su pranu de apretu nucleari po is logus tocaus de sa basi atòmica de La Maddalena. Su pròpiu annu su Prefetu de Casteddu at transiu sa bessida de su pranu de apretu nucleari de un annu, narendi ca no fiat urgenti poita in is annus 2005-2006 su portu de Casteddu no podiat arriciri naiis e sutamarinus nuclearis, ni in su portu e ni aforas, ca nci amancànt is fabricaus logìsticu-operativus chi serbiant, e ca is traballus po ddus fai ddus iant essi fatus cussus annus etotu.
-Oi, pustis de 6 annus de is scandèntzias donadas de su Prefetu, su pranu de seguresa e sarvamentu no est stètiu pubricau ancoras.

Cunsiderau ca:
1.Unu pranu de is incidentis de is unidadis militaris a spinta nucleari, po essi profetosu, depit tenni una calidadi de seguresa cunforma a su is de centralis nuclearis tzivilis. Bolit nai chi depit essi adatu a is calidadis de sa populatzioni e de su logu. Depit finas maginai ca s’apretu potzat acadessi in d-una situatzioni de normalidadi, e cunforma depit essi finantziau.

2.Su “Pranu natzionali de is mesuras de defensa contras a is apretus radiològicus” ponit comenti a primu cosa, sa craresa e sa lestresa de is scedas e de is noas, siat po sa preventzioni e siat po un’incidenti nucleari.

3.Unu pranu de apretu, finsas a candu no est connotu de is sugetus chi depint praticai is proceduras chi funt in cussu pranu etotu, mancai sa Prefetura dd’apat aprontau, tocat a ddu cunsiderai comenti e chi no s’agatit. Su pòpulu depit sciri ita depit fai e a chini si depit girai chi s’arriscu si fait arrialidadi. Sa sceda no bastat. Sa prefetura depit amostai sa calidadi de su pranu e sa capassidadi de defensa. S’eficèntzia si podit amostai faendi esercitatzionis pretzisas.

4.Una pariga de pranus chi funt pubricus, po esempru is de su “caso La Maddalalena”, o su de Taranto, funt stètius cunsideraus, de tènnicus diferentis e spertus de seguresa e fìsica nucleari, pagu cosa. A pubricai custus documentus serbit a ddus currigi, po chi bessant mellus

5.Est craru chi, candu si fueddat de incidenti nucleari seus fueddendi de sa saludi de genti meda chi est arrischendi po medas annus e in pagus oras;

6.Unu de is finis de su Sìndigu de una tzidadi est a defensai sa saludi de is tzitadinus

7.Po arrennesci in custu fini su Sìndigu depit connosci comenti est sa saludi de su pòpulu, depit pigai detzisionis, si is cunditzionis de s’ambienti funt malas meda, si nci at perìgulus mannus e, po sa diretiva Seveso (pigada in Itàlia cun su DPR 17 maju 1988, n. 175) depit informai a su pòpulu de is arriscus mannus chi ddi tocant;

8.Totu custas cosas funt aìnturu de un’interrogu chi apu giai fatu a su Sìndigu in su mesi de ladàmini de su 2012;

9.Su Sìndigu iat arrespustu ca teniat abisòngiu de tempus po ndi arrexonai cun su Prefetu e, apustis, podiat nai is arresurtaus de is circas e de is atòbius

10.Nci at passau duus annus e duus mesis, e seus abetendi ancoras is noas impromìtias;

11.S’arrennegu e su movimentu de is mesis passaus, partendi de sa manifestada de Capo Frasca de su 13 de ladàmini, finsas a s’arribu de is carrus armaus in su portu tzivili de Casteddu s’àtera dii, s’ant amostau ca sa chistioni de is tzerachias militaris est intèndia meda de su pòpulu;

12.In su 2006, sa motzioni n. 40, presentada in custu consillu comunali e firmada de su chi fiat unu consilleri, e imoi est su Sìndigu, est a nai Massimo Zedda, pediat a su Sìndigu de insaras de circai a su Prefetu e su Ministeru de sa Defensa, e de ddis pediri chi su portu nucleari de Casteddu, e aingìriu suu, ndi fessit bogau de sa lista de is portus autorizaus a su passàgiu de naiis a spinta nucleari.

Nau totu custu e cunsiderau, ddi pregontaus a su Sìndigu
– chi s’Aministratzioni scit ca s’agatat unu pranu de seguresa e sarvamentu de apretu nucleari
-cali atzionis depit mandai ainnantis chi no connoscit su pranu chi eus nau
– a torrai sceda de is noas arricias de su Prefetu ananti de custu consillu comunali e de sa tzitadi

Enrico Lobina
Giovanni Dore
Ferdinando Secchi

*Gràtzias a su Portalitu de sa Lìngua Sarda de sa Provìncia de Casteddu po s’agiudu