Custu martis eus fueddau de su turismu arreligiosu in Casteddu, partendi de custa motzioni qui

Deu ollia nai una pariga de cosas, ma no ci d’apu fatta, poita in s’interis depia fueddai cun una pariga de cumpangius e traballadoris de una cosa importanti meda. Podeis agattai innoi cussu chi ollia nai.

Seus fueddendi de una motzioni de su consilleri Chessa apitzus de su turismu arreligiosu.
Su consilleri Chessa presentat sa chistioni de Padova, po amostai comenti su turismu arreligiosu podit essi un’agiudu mannu po fai cresci e amellorai is movimentus turìsticus in sa tzidadi de Casteddu e in Sardìnnia.
Po amellorai su turismu arreligiosu si proponit a su Comunu de Casteddu de traballai po unu acòrdiu cun sa Crèsia e, mi parit de cumprendi, cun is francescanus, de manera chi su fabricau de Viali Frannàsiu potzat andai a is francescanus, ma sceti chi ndi faint una domu de turismu arreligosu.
Nci funt medas chistionis chi custa motzioni pertocat.
Sa prima est su turismu arreligiosu. Su consilleri tenit arraxoni. Su turismu arreligiosu, in Casteddu e in Sardìnnia, podit essi unu de is naturalis nostus, chi sceti nosu teneus, e chi podit agiudai a fai benni turistas a Casteddu. S’Arregioni sarda, e su stadu italianu, at fatu cosas po custu.
Deu, de parti de mama seu de Mandas, e de inguni at inghitzau totu un’atzioni apitzus de su caminu de Santu Jacu.
In totu custa atzioni sa Crèsia podit fai calincuna cosa? Po mei giai, e nd’apu a fueddai a s’acabada.
In su fabricau de Viali Frannàsiu, imoi, nci funt serbìtizius de su Comunu de Casteddu, chi funt de importu mannu. Calincunu est ghiau in deretura de su Comunu, àterus funt donaus in “cuntzessioni”, naraus.
Is serbìtzius de Viali Frannàsiu, chi connosceus totus, no funt cosa discantzosa a movi. Nci depeus pensai? Po mei giai, ma no podit essi custa motzioni chi fait sighiri s’arraxonamentu. E prima de pensai de movi, depeus sciri cumenti ammellorai, movendiddus, is serbitzius comunalis chi immoi funt inigui.

E poneus puru chi su logu una dii siat scapu. Iniguni nci funt medas serbìtzius de s’Universidadi de Casteddu, chi est pedendi, iniguni, atèrus fabricaus.
No at’essi una cosa profetosa a pensai, inguni, de fueddai cun s’Universidadi? Po mei giai. Chi bolint su logu, ndi chistionaus impari de su chi ingui nci bolint fai, e agoa bieus.

Arregordu a totus ca in su mesi de abrili de su 2013 emus cuncordau innoi, in Consillu, una sètzida apitzus de s’universidadi, cun sa presèntzia de s’“Arrettori” de s’Universidadi de Casteddu. Est stètiu una faina meda importanti de su Consillu, e seus tambeni abettendi is arresurtaus mannus de cussu atòbiu.

Una cosa chi scieus, e chini at studiau e traballau, cumenti a mei, in Viali Frannàsiu ddu scit, est chi s’Universidadi tenit abisòngiu de cussus logus, po ndi pesai serbìtizius po is studiantis e is circadoris.

No seu nendi ca nosu si-ddu depeus donai. Seu nendi ca nosu depeus scioberai aguantendi a notu a su chi boleus fai in cussu logu, chi est puru a mesu de unu logu naturalìsticu e archeològicu meda importanti.

Custa motzioni ponit su problema, chi eus giai bistu in s’Òrdini de sa Dii chi sa motzioni arregordat.
Sa solutzioni no mi parit depat essi, a su mancu imoi, sa de sa Motzioni.

Sa Crèsia est connoscendi un’ora de cambiamenta stòrica.
Su prus “teologo” catòlicu importanti, Hans Kung, no at essi pensau, pustis de Papa Giovanni Paolo II (segundu) e de Benedetto XVI (dexi-seis), de tenni unu papa comenti a papa Frantziscu.

Fueddendi de sa crèsia arricca e, duncas, de sa crèsia italiana e de sa crèsia sarda puru, Frantziscu at nau: “Aberei is cumbentus a is chi non tenint domu, donai-si-ddus – su chi tenit sa crèsia est po issus, po sa genti chen’e domu”.
In Casteddu nci funt meda logus de crèsia chi s’òmini podit imperai po is chi funt chentza de domu, e po chistionis de turismu arreligiosu puru.
Poita depeus donai nosu is logus comunalis?

Fatzu sceti unu esempru: su cumbentu de s’Incuisitzioni, de s’Ofìtziu Sacru, in pratza Santu Domìnigu, est mannu, tenit prus de centu aposentus po dormiri.
Nci bivint in cuàturu. Cuàturu paras, dominiganus, chi funt dirigidoris de unu cumbentu chi, sceti sa coxina, est manna sa metadi de su consillu (forsis est mellus de custu Consillu).
Poita no podeus pensai, in nòmini de Frantziscu, a un’agiudu a su populu de Casteddu e de Sardìnnia, de fai iniguni unu logu aundi cuncordai serbìtizius po su turismu arreligiosu?

Chi su consilleri Chessa cambiat sa motzioni in sa manera chi apu nau deu, deu seu prontu a dd’avotai. Deghinò, no seu de acòrdiu a detzidi imoi, innoi, ita depeus fai de unu logu aici importanti, stratègicu, eus a nai, de sa Tzidadi, cumenti is fabbricaus comunalis de Viali Frannassiu.