Pro una caminera noa – Su parri cosa mia
Custu domìnigu s’eus a atobiai in Santa Cristina po fueddai de polìtica. Est domìnigu, ddoi at basca, perou sa polìtica est fata po genti chi furat o po genti chi connoscit su sacrifìtziu, fintzas su sacrifìtziu de sa vida. Figuraisì ita est su sacrifìtziu de andai a Santa Cristina unu domìnigu.
Genti meda chi oberit sa buca sceti po nai tontesas o po si chesciai custas cosas no ddas cumprendit, ma medas eja.
Sa tenta, po imoi, est de si biri a pari, e de fai de pressi a detzidi cosas de importu. De Casteddu Citadi Capitali a Furia Rossa, de Fronte Indipendentista Unidu a Liberu, de Rifondazione Comunista a Sardegna Sostenibile e Sovrana, e medas atrus, s’ant a arreconnosci a pari. Pustis no si chescieis chi no si poneus a pari! Asumancu nci eus provau, e eus cumbidau puru medas atrus.
Bosatrus nci seis?
Apu ligiu su “Appello pro una caminera noa: appunti per la discussione”, e torru gràtzias a is piciocas e is piciocus chi nci ant traballau.
Dda agatais innoi Chentu Concas
Deu bollu aciungi calincuna cosa
- Boleus guvernai o no?
Sa polìtica, e is movimentus sotzialis, si podit irvilupai de manera diferenti. Nosu depeus nai a nosu etotu chi boleus tenni sa tenta de guvernai, est a nai a essi unu movimentu mannu, chi fait liongius cun organizatzionis politicas chi tenint bisuras differenti. Chi sa tenta no est custa, podeus detzidi de portai ainnanti is cosas de manera differenti.
Deu tengu, a su mancu po su traballu chi fatzu, e puru po atras arrexonis, una “cultura di governo”.
- Boleus fai una organizatzioni polìtica?
Teneus duus tretus ananti de nosu. Su primu est a si biri dònnia tanti, partidus e assotzius, po biri chi dda pensaus de sa propia manera. Su de duus est de detzidi de portai ainnanti su nascimentu de una organizatzioni polìtica, aundi is partidus e is assòtzius chi esistint podint abarrai e, perou, depint donai soberania a s’organizatzioni. S’arregula, po detzidi ita si depit fai, est “unu balit unu”.
- Eletzionis. Ita boleus fai?
Fait arriri ca is partidus soberanistas e indipendentistas bolint ghiai s’arregioni e no arrennescint a si presentai a is eletzionis in is biddas e in is citadis. Cun chini ddu faeus s’avolotu? Sa tenta depit essi de si presentai a eletzionis, a su mancu a nci tentai, o no? E po is eletzionis sardas de su 2019, ita boleus fai? Giai oi seus unu pagu a trigadiu.
Depeus sciri una cosa: su traballu chi inghitzaus at a durai 15-20 annus. Prontus seus a ddu fai? Ddoi ant “militantis”, “sordaus” prontus a gherrai chi scint ca sa cosa est longa?
Tags: sardegna ; sardìnnia ; pòlitica ; avolotu ; elezioni regionali 2019 ;