Custu articulu ddu podeis agattai puru innoi, in ingresu: http://www.transform-network.net/blog/blog-2015/news/detail/Blog/-5e8caea5ae.html

Sa Manca Europea cumprendat su chi funt is movimentus de autodeterminatzioni

de Marco Siddi, po su sotziu Comuna

Finsas a imoi sa Manca Europea, est a nai s’assòtziu de unus cantu partidus de manca de natzionis europeas, no at distintu beni meda is movimentus de autodeterminatzioni chi tirant a manca de is movimentus natzionalistas chi tirant a dereta.

Unus cantu studiaus e cabus polìticus de sa Manca Europea, pensant chi is movimentus polìticus de is natzionis chena de Stadu, autonomistas o indipendentistas, siant cumenti sa Lega Nord in Itàlia. Est una cosa fora de dònnia contu, pròpiu ca in su 2014 is progetus de manu manca prus de interessu in Europa ddus ant fatus is movimentus de autodeterminatzioni.

Tanti po ndi nai una, in su 2014 su Partidu Natzionali Scotzesu est stètiu su chi est arrennèsciu mellus a ponni in chistioni su costumu polìticu malu de sa Grandu Britànnia, fendi unu traballu mannu po s’indipendèntzia de sa Scòtzia, po sa sanidadi pùbrica, po sa scola chena de depi pagai, po fai bivi in sa natzioni is imigraus e po una sotziedadi cun prus giustesa sotziali e possibilidadis ogualis po totus.
Funt chistionis chi sa Manca Europea s’est interessada sempri e su Partidu Natzionali Scotzesu at pigau custa postura in d-unu Stadu, sa Grandu Britànnia, innui no s’agatat nimancu unu partidu assotziau a sa Manca Europea.
Sa chistioni natzionali scotzesa caminat paris cun chistionis sotzialis chi nisciunu atra fortza polìtica de sa Grandu Britànnia iat tentu mai sa boluntadi de fai balli, o comuncas mai nci fiat arrennèscia de sa pròpiu manera.
Insandus, po cali arrexoni sa Manca Europea iat a depi tenni sa postura sempri e comuncas de essi contras a is movimentus de autodeterminatzioni de is natzioni chena de Stadu e de is arregionis?

Partidus polìticus cumenti su Partidu Natzionali Scotzesu no funt natzionalistas, funt internazionalistas cumenti e prus de is partidus de sa Manca Europea. Espressant una parti manna de sa natzioni insoru, in Scotzia sa prus parti de sa natzioni, e circant de si bogai de sa polìtica dominadora de su Stadu, innui a su contras funt prus fortis meda in interessus de sa dereta de Cameron e est dèbili tropu su Partidu Laburista. Sa Manca Europea no depit pensai chi is Stadus cumenti funt oi aici depant abarrai po sempri, de prus puru chi custus Stadus, cumenti sa Grandu Britànnia, ddus guvernant forzas polìticas chi pigant de unu tempus passau de dereta e colonialista.

Sa Manca Europea intamis depit pensai e fai struturas polìticas diferentis, chi fetzant s’interessu de sa genti e agiudint a cumpriri is progetus de manca. In prus si iat a depi ponni cun is fortzas de manca chi batallant contras a su poderi centralisau e de pagu cambiamentu de is Stadus. Sa chistioni podit balli po sa Scòtzia, sa Catalùnnia, is Logus Bascus, s’Irlanda, sa Sardìnnia. Su partidu irlandesu Sinn Féin e s’assòtziu bascu Euskal Herria Bildu funt giai a intrus de su European United Left/Nordic Green Left (GUE/NGL) in su Stamentu Europeu.

Fortzas polìticas chi podint assimbillai a custas funt bessendi a pillu in Sardìnnia puru, innui s’assòtziu Sardegna Possibile at pigau prus de su 10% de is votus a is ùrtimus eletzionis arregionalis (friaxu de su 2014) e imoi si iat a podi afortiai alliendisi’ cun setzionis noas e giòvunas de sa manca. In d-unu tempus chi is làcanas de is Stadus de s’Unioni Europea contant sempri prus pagu, sa Manca Europea si depit oberri a is movimentus de autodeterminazioni chi tenint unu progetu sotziali de manca e totu.

Tradusidura de s’Ufìtziu de sa Lìngua Sarda de s’Unioni de is Comunus de Trexenta – Progetu Chistiona (lei 482/99)
https://www.facebook.com/profile.php?id=100008814963521&fref=ts
chistiona@libero.it – tel. 349.342.00.05