Su lìburu de Lorenzo Marsili e Yanis Varoufakis “il terzo spazio – oltre establishment e populismo”

Seu castiendi a Varoufakis cun atentzioni meda de candu at tentu su coragiu de fai cumprendi a Alexis Tsipras, su primu ministru de Grecia, chi fiat sballiendi. At sballiau in su 2015, candu s’est fatu frigai de sa Merkel, Renzi, Hollande e totu is atrus.

In su 2016 Varoufakis, chi est professori de economia, ndi at fraigau unu movimentu “pan-europeo”, chi ddi nant Diem25.

Ddoi at una truma bella de ominis e fèminas de Casteddu chi sighint Diem25.

Lorenzo Marsili, issu puru de Diem25, at scritu cun Varoufakis su lìburu chi unu amigu at bofiu chi ligessi.

Su lìburu tenit calincunu interessu. S’ògetu de su lìburu est s’Europa de oi, e is maneras po dda cambiai, faendi de manera chi unu nci potzat bivi chene trumentu.

A parri miu nci funt cosas chi depint essi studiadas unu pagu mellus. Po essempru, oi su Portugallu depit essi studiau mellus. Po Marsili e Varoufakis “alla fine, Costa la spunta e viene nominato primo ministro. Trovandosi, durante tutto il 2016, a dover far inghiottire lui stesso la pillola amara dell’austerità e del rispetto dei parametri di bilancio imposti dall’Eurogruppo, condannando così il paese alla stagnazione e i suoi giovani all’emigrazione”. Po su chi sciu e lìggiu deu, sa chistioni est diferenti. Sendi una natzioni pitichedda, su Portugallu est arrennescendi a nci bessiri de s’austeridadi prus lègia, fintzas abarrendi in sa UE. Perou est cosa de studiai mellus….

Cali est sa chistioni centrali de su lìburu? Est sa tenta de ndi fraigai una propònnida po s’Europa, differenti de s’establishment (centrumanca e centrudereta) e de su “populismo”. Po Marsili e Varoufakis “populismo” est sa dereta natzionalista e arratzistas.

Po su chi pertocat sa chistioni de su “populismo”, ddoi at faddinas. In Europa Podemos, Melenchòn (Frantzia) e Corbyn (Reinu Uniu) funt popùlistas. Fora de s’Europa Sanders est unu popùlista.

Popùlismu est sa manera de arribai a su coru e a sa brenti de sa genti. Oi nci arribaus chi seus simpris e deretus, chi fraigaus unu barrancu craru: nosu/issus. Issus funt is enemigus, is élites, nosu seus su pòpulu.

Teneus abbisongiu, in Sardìnnia e in Europa, de unu “populismo democratico”.

E issus puru ddu scint, candu scriint ca “le rivolte populiste hanno ragione da vendere”.

Po su chi pertocat s’economia e s’euro, seu diacordiu cun issus candu scriint ca “uscire dall’euro non ci farà uscire dal fondamentalismo di mercato. Serve una dimostrazione? Brexit!”.

Tenint arrexoni, perou tocat a tenni, imparis cun “pranu a” (fai una costituente e scriri torra is trataus de sa UE), puru unu “pranu B” e unu “pranu C”. Chi no si faint scriri unu tratau nou, ita faeus? D’acabaus comenti a Tsipras. Apitzus de custa cosa apu giai scritu.

Su lìburu fueddat de medas cosas de importu. Ndi sceru sceti una, chi est una propònnida “de crassi”: “un dividendo universale di base”. Est a nai, su chi godangiant is grandus siendas, chi funt ativas meda in su “bussa” e in is mercaus finantziarius, ddu depint donai a su pòpulu. Ddu depint spraxi e, chi no bolint, si ddus pigau.

S’Italia, is studiaus italianus, funt sempiri stètius maladius de “cosmopolitismo”. Gramsci at scritu meda apitzus de custu. A is amigus de Diem25 de Sardìnnia bollu nai ca faint beni a sighiri sa debata europea e chi depint perou puru castiai in domu insoru. Ita ddoi at in Sardìnnia? Ita depeus fai? Po essempru, si podit cumprendi sa Sardìnnia chena cumprendi su sardu, e fueddendi in italianu?

Cun s’atobiu de su 23, eus inghitzau a fraigai unu movimentu populari, chi bolit fai su chi est scritu in su libru: “oltre la negoziazione con gruppi di interesse, si tratta di inserire la cittadinanza in un percorso virtuoso di partecipazione e co-decisione – di sovranità – ben oltre l’appuntamento quinquennale alle urne. […] Gli esempi esistono, come le piattaforme decide.Madrid o decidim.Barcellona”.

Nosu nci poneus energias, coru e conca. Ddu faeus imparis?