Custa cida duus amigus m’ant fatu cumprendi, una borta de prus, unu giogu de sa vida: sa genti mala no cumprendit ca ddoi at genti che scrit su chi pensat, o fait su chi fait, sceti poita ddu pensat e scit ca est giustu a fai una cosa.
Funt òminis e fèminas lìberus e lìberas, perou medas no ddu cumprendint, poita issus funt scraus o arrexonant cun su pensamentu “o cun mei o contra de mei”. Medas de issus, casi totus, funt puru aintru de s’arrexonamentu del “tengo famiglia”[1].
Bidu Biolchini s’atra dii at scritu custu e at postu chistionis istòricas e polìticas de importu po su chi pertocat s’òmini chi est stètiu, a parri miu, su mellus presidenti de sa RAS (Règioni Autònoma de Sardìnnia) de sempiri: Renato Soru.
Sa polìtica de centrumanca, pruschetotu casteddaia, at arrespustu scriendi e nendi ca Bidu scrit diaici poita no ndi at godangiau, de Soru, su chi boliat.
Connosciu Bidu de meda, e sciu chi no est diaici. S’arrespusta de issu d’agatais innoi.
Andria Pili est unu scienti cerexinu, indipendentista, chi scrit sempiri su chi pensat. S’atra dii at fatu unu post in fb po fai sciri ita ndi pensàt de su lìburu de Francesco Casula “Carlo Felice e i tiranni sabaudi”. Dd’agatais innoi.
Su mundu piticu de s’indipendentismu e de su movimentu linguisticu, pruschetotu genti manna de edadi, dd’at pigada mali, e dd’ant amelezau, dd’ant nau chi fiat “manovrato da chi un giorno lo abbandonerà”.
Andria at arrespustu pighendiddus po culu, e tenit arrexoni.
Unu podit essi diacòrdiu o nono cun Bidu e Andria, perou sa beridadi est ca sa Sardìnnia tenit abbisòngiu de genti diaici. Ominis e fèminas chi nant e faint su chi pensant, chi no depint nudda a nemus, chi funt lìberus, no funt aintru de nisciunu “clan”, no tenint pardinus de difendi, e no creint a s’arrexonu del “tengo famiglia”.
Deu, po su chi contat, seu cun issus.
[1] S’arrexonamentu del “tengo famiglia” mi dd’ant fatu meda in polìtica, e in is ùrtimus annus in su sindacau. Est casi sempiri diaici: “tu hai ragione, però non posso dire e fare le cose che dici tu, ho una posizione da mantenere, non la posso mettere a rischio. Sai, ho una famiglia, dei figli. Se fossi solo sarebbe un’altra cosa”.
