Po sa dii de sa Sardìnnia 2020
Nosu Sardus afestaus oi sa festa nostra, sa Die de sa Sardigna. Dda afestaus ocannu puru, in custu tempus diffitzili, e dda afestaus cumbintus e fintzas cun cuntentesa.
De duus mesis s’Italia e s’Isula funt ‘inserradas’. Fintze nosu contaus is mortus, is maládius no fait prus mancu a ddus contai. Ancora proibius, teneus sempri prus pentzamentu po s’incrasi
Seus bivendi sa carantena inserraus in domu, is diis de fatu ddas passaus s’imprús sentza de “fai”, e aici parint chi depant passai is dis de su connotu, sa dì de Pasca Manna (12 de abribi), sa dì de sa Liberatzioni de su nazi-fascismu (25 de abrili), sa dì de Sant’Efis (1 maiu). Ma sigheus a bolli afestai sa dí de sa genti nosta (28 de abrili). Is festas funt novas bonas chi arribant a nosu de su tempus passau, nosi donant cuntentesa e fortza po su tempus benidori, allébiant su traballu de dónnia dì. Chentza ‘e festa, no podeus bivi; chentza ‘e is festas suas unu pópulu no iscit nimmancu e chini est.
Su 28 de abrili de su 1794, sa genti de Castedhu iat inserrau totu is impiegaus in Sardigna de su Guvernu piemontesu po ddus fai partiri torra a continenti. No fiat prus bastanti una arresposta benia tropu a tardu a is Cincu Preguntas presentadas s’annu a innantis a su Rei de parti de is Istamentus. Fiat totu s’assentu feudali chi tocàt a sciusciai: Procurade ’e moderare, barones, sa tirania…aici cumintzat e aici fait sa torrada de s’innu natzionali de is Sardus. Totu at cumintzau in custa dì de rebbellia.
Si podit nai ca sa Sardigna de oi nascit in is annus chi funt cussus matessi de “libertadi, egalidadi, fraternidadi” chi ant donau vida a is pópulus de s’Europa. Coment’ e áterus, su Pópulu sardu s’est dépiu difendi de s’armada de is frantzesus chi si ndi bolliant ponni meris. Ma a innantis meda de áterus at cumintzau a si ndi libberai de s’assentu antigu. Is tres annus de su 1793 a su 1796 funt su coru de sa “Sarda Rivolutzioni”, chi at bistu frutus de dolori po binti annus, candu is patriotas sardus si funt torra furriaus, ant sunfriu annus de presoni, crudelidadis e cundennas a impiccadura. Sa “reatzioni” in Sardigna at durau prus che in su arrestu de s’Europa, est istétia prus forti e at fatu dannu meda.
In Sardigna puru s’obréscida de s’edadi moderna at tentu is erois suus, e at pagau su prétziu mannu de is mártiris suus. Totu custu dd’arregodaus oi, chi teneus istitutzionis líberas e democráticas. Creeus prus e prus ca oi ancora teneus abisóngiu de istitutzionis chi scípiant fai rapresentàntzia prus manna de is Sardus coment’e atoris primus de sa stória insoru, cun d-una tzivilidadi e una lingua própia de issus, e meris de deretus soberanus in sa terra insoru, coment’e totu is áteras gentis. “Libertadi, egalidadi, fraternidadi” no sunt fatas una ‘orta e po sempri.
Po is Sardus de oi, s’identidadi natzionali insoru domandat áteras possibilidadis istitutzionalis po podi arrespundi mellus a is abisóngius de custu momentu importanti de s’istória. Po ndi bessiri beni de custa pandemia nci bolint arrichesas foras de s’ordináriu, materialis e ispiritualis, est a nai culturalis, políticas e sotzialis.
Is Sardus de oi funt nebodis de is chi ant sunfriu torrendi nou s’assentu apustis de sa primu gherra mondiali, e funt fillus de is chi ant fatu sa prima autonomia regionali. Po custu teneus ispera e siguresa chi ant a agatai su modu de ndi bessiri torra impari de unu tempus aici diffitzili.
Candu su tempus de sa pandemia at a permitti de torrai a una vida prus normali, si boleus fai cresci torra s’economia cun is arricchesas chi funt de sa terra nosta, si boleus apretziai comenti si depit totu s’erentzia de lingua e de cultura chi ancora resistit, fendi faci a dónnia cosa contrària, in biddas e tzitadis, iat a essi s’ora de podi arrennoai is istituzionis de rapresentàntzia tzivili e politica, agatendisì totu is fortzas democraticas in cussa assemblea costituenti nomenada de totus e no de immoi. Ma immoi iat at a essi s’ora. Ddu pedit sa festa de is Sardus, ddu narat su tempus. Poita, Cando si tenet su bentu est pretzisu a bentulare.
Su Comitau pro ‘sa Die de sa Sardigna fondazionesardinia@
