Sèmpiri prus sardas e sardus funt scrètius, no creint prus a nudda e no ndi bolint intendi nudda de nudda. Bivint fendi sacrifìtzius mannus, tenint problemas de saludi e/o cun fillas e fillus chi no ddus faint ni dromiri beni ni bivi beni a de dii, e no ndi bolint intendi de polìtica o cosas diaici. De meda no andant a votai… e funt sèmpiri de prus is chi inghitzant a no ddoi andai prus.
Chini tenit su poderi si-ndi gosat. Atentus perou, chini tenit su poderi, cussu beru, no est in consillu arregionali o in giunta. Su poderi est in àterus logus.
Chini est consilleri o assessori est su serbidori, mancai pagau beni, de cussus poderis chi faint sceti dannus a sa vida nosta. Calincuna e calincunu fait finta de essi contras, ca fintzas a oi, po su chi bieus, a essi contras est stètiu unu giogu, una finta. Unu “gioco delle parti” ddi nant in italianu.
Nosu, de StzS (Sardìnnia tzerriat Sardìnnia) boleus cumbati. Serbit a donai sentidu a sa vida nosta, e serbit a fai bivi mellus a nosu e a is fillas e fillus nostus.
Scieus chi serbit. Is chi nant “no serbit a nudda, no càmbiat nudda”, no tenint arrexoni. No est diaici.
Teneus duus essemprus, pròpiu de is ùrtimus duus annus.
Su primu est custu: in su 2024, e a nai sa beridadi fintzas in su 2023 e in su 2025, unu sciacu mannu de sardas e sardus ant fatu cumprendi chi no boliant una àtera tzerachia, custa borta sa tzerachia energètica, chi benit apustis de sa militari e de sa chìmica, e de is minas etc.
Totu su pòpulu si ndi est pesau!
Deu nci femu su 15 de su mesi de argiolas 2024, a firmai is pàlias eòlicas, e a medas àteras manifestadas. Casi sèmpiri no femus bastantis, perou sciemus chi tenemus totus is sardus cun nosu.
Tocat a nai chi ddus eus frimaus. Is impiantus, bogau calincunu, no funt andendi ainnantis. Funt abetendi chi mollaus, po torrai a inghitzai.
Su de duus est custu: chena totu cussa genti in pratza po sa Palestina, a is boluntàrius de sa “Freedom Flotillas” ddus iant a ai sparaus e mancu custa “paxi finta” iat a essi fatu Trump.
E insaras tocat a si nai chi no est berus chi sa cumbata no serbit a nudda.
Nosu boleus imperai totus is ainas de sa democratzia chi esistint in sa sociedadi nosta: una aina manna funt is eletzionis, chi perou imoi, a su mancu in Sardìnnia, tenint arrègulas frassas, sballiadas, chi bocint sa democratzia.
Po custu eus postu impari dexenas de organizatzionis e centenas de personis in “Ricostruiamo la democrazia”, e eus fatu atòbius apetotu in Sardìnnia. A s’acabbu eus stèrriu unu documentu aundi scrieus ita pensaus, ita pedeus e ita est s’arresurtau de custu protzessu de partecipatzioni populari.
Is princìpius chi funt bessius funt 6:
- Sistema eletorali proportzionali: totu sa sociedadi depit tenni sa possibbilidadi de mandai rapresentantis suus a su consillu arregionali;
- Eletzioni de su Presidenti in consillu arregionali: su presidentzialismu no at funtzionau, tocat a cambiai;
- Su votu est unu: no est chi votas su consilleri de una parti e su presidenti de una àtera: custu agiudat su votu incuinau, comporau;
- No boleus triminaxus eletoralis diaici artus (10% e 5): est una bregùngia manna, seus is peus de Europa!
- Is logus sbuidus, cun prus pagu genti, depinti contai de prus;
- Depeus ponni arrègulas chi permitant a is fèminas de essi sa metadi de is mascus, in consillu arregionali.
Podeis ligi innoi totu su documentu.
No teneus nudda de perdi. Boleus democratzia. Eus a cumbati fintzas a s’acabbu, scieus ca est una gherra giusta. E, comenti eus biu, chi si gherrat a calincuna cosa si lompit. Chi gherraus totus, ancora de prus.
