libertà

Sardìnnia turìstica, Sardìnnia turìstica, Sardìnnia turìstica…..MA BASTAT!!

A totus praxit a fai viàgius, a connosci logus, a fai is turistas, a solus o in cumpangia. In Sardìnnia est de candu seu piticu chi intendu genti nendi: “dovremmo vivere di turismo”. Su turismu est amanniau meda in is ùrtimus annus, mancai no seus ancora a tipu Ibiza o Formentera.

Sa pregunta est: boleus bessiri comenti e Ibiza e Formentera? Deu no no seu deacòrdiu.

No presentu innoi nùmurus, stùdius etc. A s’imbressi, si contu sceti su chi biu, su chi no mi praxit.

Biu unu logu, sa Sardìnnia, sèmpiri prus bèciu e sbuidu, e sa capitali cosa sua, Casteddu, sèmpiri prus bècia e sbuida.

Tui aturas frimu, in Casteddu, in su tzentru stòricu, e biis trumas mannas de genti chi pascit, no sciint beni aundi, perou totus a su pròpriu logu andant, sèmpiri in is pròprius logus. Funt medas, fueddant lìnguas meda de Europa, circant no si sciit beni ita. Oi su tzentru stòricu de Casteddu est una àtera cosa, est cambiau chi pensu a su chi fiat in su 2005, no in su in 1985.

Pratza Garibaldi, bia Garibaldi (bia de is argiolas), bia Manno (sa Costa), Corso Vittorio Emanuele (sa passillada, su brugu). Antis fiant is bias aundi comporai e s’atòbiai. Oi funt una àtera cosa; funt una “friggitoria a cielo aperto”, comenti narant in medas. Difatis fintzas “shopping sotto le stelle” imo ddi nant “shopping and food sotto le stelle”.

A totus praxit a papai in foras. Po caridadi, no seus fueddendi de custu.

Perou est custu su benidori chi boleus po nosus? Ddu scriu che bividori de su tzèntru stòricu de sa citadi. Boleus “pizzetterie, poke, yogurtherie, birrerie” e cosas diaici de pratza Garibaldi a Portico de Palabanda?

Custu arrexonamentu est acapiau a su chi at nau Gianni Chessa s’àtera dii, candu at nau chi issu preferit is launeddas a su jazz. A parri miu est fàula, poita deu a unu cuncertu de launeddas mai biu dd’apu. E in prus poita depeus sonai is launeddas e baddai po is turistas? No ddu podeus fai po nosus e totu?

Impitzus de su chi at nau si sinnalu su chi at scritu Miali Atzori, poita seu diacòrdiu cun issu.

S’àtera dii “La Nuova Sardegna” at scritu chi in d-una dii 31.000 personis funt lòmpias a s’aereoportu de Terranoa. Ariseru femu in s’aereoportu de Casteddu, a mesunotis, chi fiat prenu comenti unu ou de turistas, de màchinas etc.

M’est partu su logu prus biu de Casteddu, forsis de Sardìnnia, a cuss’ora.

Cali Sardìnnia seus lassendi a chini benit pustis de nosu?

Andant beni is turistas, ma chi aturant sceti issus si furriaus a unu “luna park” po is stràngius, aundi po bivi si depeus ponni a coxinai, sonai is launeddas po is stràngius e, podit essi, fintzas fai intendi chi esistiat sa lìngua sarda, “una lìngua ‘ancestrale, che racchiude nella sua incomprensibilità l’orgoglio del fiero popolo di Sardegna, che mai si è arreso agli invasori”.

Eja, credici, nant in Casteddu….